Na. Ofisi ya Mkuu wa Mkoa
Maafisa
habari wa mkoa wa Iringa wametakiwa kudumisha ushirikiano wao ili kurahisisha
ubadilishanaji wa habari kwa lengo la kuwafikishia huduma hiyo wananchi.
Kauli
hiyo imetolewa na kaimu Katibu Tawala Msaidizi, Sehemu ya Utawala na Rasilimali
watu, Neema Mwaipopo alipokuwa akifungua kikao kazi baina ya afisa habari wa
mkoa wa Iringa na maafisa habari wa halmashauri nne za mkoa wa Iringa
kilichofanyika katika ofisi ya mkuu wa Mkoa wa Iringa.
 |
| Kaimu Katibu Tawala Msaidizi Sehemu ya Utawala na Rasilimali watu, Neema Mwaipopo |
Mwaipopo
amesema “napenda niongelee suala la ushirikiano baina yenu katika kutekeleza
majukumu yenu ya kihabari na majukumu mengine ya kiserikali”. Amesema kuwa
mafanikio na ufanisi katika kazi hutegemea sana ushirikiano madhubuti baina ya
wadau wa sekta husika. Ameongeza kuwa utaratibu mzuri wa kubadilishana habari
na taarifa kwa mujibu wa taratibu za serikali kutasaidia kuleta chachu na
ufanisi katika kazi za maafisa habari wa mkoa wa Iringa. Amesema kuwa
kulegalega kwa ushirikiano baina ya maafisa habari kunachangia kudorora kwa
ufanisi wa kazi katika tasnia ya habari.
Kaimu
Katibu Tawala Msaidizi, Utawala na Rasilimali watu amesisitiza ushirikiano
baina ya maafisa habari na vyombo vya habari. Amesema kuwa ushirikiano huo ni
nyenzo muhimu katika kutekeleza majukumu ya maafisa habari. Amewataka kuendeleza
na kuimarisha ushirikiano na vyombo vya habari vya mkoa wa Iringa. Aidha,
amewataka kuvipatia msaada wa kitaalamu na kiufundi ili viweze kufanya kazi kwa
weledi zaidi. Aidha, amewataka kuwa makini katika jukumu hilo kwa kufuata
sheria, kanuni na taratibu za serikali zilizopo.
Mwaipopo
amesema “ni ukweli usio na shaka kuwa maafisa habari wana jukumu kubwa sana
katika kuwapasha habari wananchi wa mkoani Iringa na Tanzania kwa ujumla kuhusu
utendaji kazi wa serikali hasa utekelezaji wa Ilani ya uchaguzi ya chama cha
Mapindizi ya mwaka 2010”. Amesema kuwa maafisa hao wana jukumu la kutoa habari
au kutengeneza mazingira ya kupatikana habari zinazoelezea fursa zilizopo
katika maeneo yao zinazohusu uwekezaji”. Aidha, amewataka kuhakikisha serikali
inasikika na shuguli zake zinafahamika kwa wananchi mkoani Iringa.
Mkuu
huyo wa utawala amewataka maafisa habari kuhakikisha wanakamilisha mipango kazi
yao ya mwaka ili waweze kutekeleza majukumu waliyojipangia kwa mwaka. Amesema
“mpango kazi wa mwaka ni muongozo katika utekelezaji wa majukumu ya kila siku.
Ni matumaini yangu kikao kazi hiki kitaweka azimio la kila afisa habari
kutengeneza mpango kazi wake utakaokuwa dira katika utendaji kazi wake”.
Vilevile, amewataka kuhakikisha wanakamilisha ujazaji wa fomu za mfumo wa
upimaji wa wazi utendaji kazi (OPRAS). Amesema “niongelee kidogo umuhimu wa
utekelezaji wa mfumo wa upimaji wa wazi wa utendaji kazi (OPRAS) kwa maafisa
habari. Mfumo huu wa OPRAS umeanzishwa kwa mujibu wa Sheria ya Utumishi wa Umma
Na. 8 ya Mwaka 2002 kama ilivyorekebishwa na Sheria Na. 18 ya Mwaka 2007”.
Amesema kuwa utekelezaji wake umesisitizwa katika Kanuni za Kudumu za Utumishi
wa Umma toleo la Mwaka 2009 na kufafanuliwa zaidi katika Waraka wa Utumishi wa
Umma Na. 2 wa Mwaka 2004. Amesitiza kuwa utaratibu huo maana yake kupanda cheo
kwa afisa habari kutazingatia taarifa za upimaji wa wazi wa utendaji kazi
(OPRAS).
Akiongelea
lengo la kuandaa kikao kazi hicho baina ya afisa habari mkoa wa Iringa na
maafisa habari wa halmashauri, afisa habari mkoa, Dennis Gondwe amesema kuwa
kikao kazi hicho kimelenga kudumisha na kuimarisha ushirikiano baina ya maafisa
habari hao. Amesmea kuwa kikao hicho linataka maafisa habari wawe na uelewa wa
pamoja katika sekta ya habari na kuongeza wigo wa upatikanaji wa habari katika
ofisi za umma.
 |
| Kaimu Katibu Tawala Msaidizi Sehemu ya Utawala na Rasilimali watu katika Ofisi ya Mkuu wa Mkoa wa Iringa, Neema Mwaipopo (watatu kulia) akiwa katika picha ya pamoja na Afisa Habari Mkoa na Maafisa Habari wa Halmashauri |
=30=
Hakuna maoni:
Chapisha Maoni