Na. Ofisi ya Mkuu wa Mkoa
Historia
ya chifu Mkwawa ya ujasili wa kupinga ukoloni imelisaidia Taifa wakati wa
kupigania uhuru nchini na nchi za jirani kusini mwa Afrika.
Kauli
hiyo imetolewa na Waziri Mkuu wa Jamhuri ya Muungano wa Tanzania, Mizengo Pinda
katika hotuba yake ya kilele cha maadhimisho ya kumbukumbu ya chifu Mkwawa na utamaduni
wa mkoa wa Iringa, iliyosomwa kwa niaba yake na Waziri wa Nchi, Ofisi ya Makamu
wa Rais (Mazingira), Dkt. Binilith Mahenge na kufanyika katika kijiji cha
Kalenga nje kidogo ya mji wa Iringa.
Pinda
“historia ya chifu Mkwawa ya ujasiri na kupinga ukoloni imelisaidia Taifa letu
wakati wa kupigania uhuru na pia wakati wa harakati za kudai uhuru kuzisaidia
nchi jirani za kusini mwa Afrika. Hivyo, inatupasa sote kuendelea kudumisha
mila, desturi na tamaduni zetu kwa ustawi wa jamii na Taifa kwa ujumla”.
Waziri
Mkuu amesema kuwa historia ya Mkwawa na utamaduni wa mkoa wa Iringa umechangia
kwa wageni wengi kutoka nchi za nje kupenda kutembelea mkoa huo. Amesema lengo
la wageni hao kutembelea ni kuona maeneo ya kihistoria na kitamaduni
yanayohusiana na Mtwa Mkwawa. Amesema kuwa kutokana na nafasi hiyo ya kimkakati
ndiyo iliyopelekea mkoa huo kuteuliwa kuwa kitovu cha utalii kwa nyanda za juu
kusini mwaka 2009.
Pinda
amewataka wananchi wa mkoa wa Iringa kuendelea kuenzi na kuthamini utamaduni
wao. Amesema utamaduni huo ni kichocheo kikubwa katika kukuza maendeleo ya wananchi
na Taifa.
Aidha,
ametoa rai kwa wananchi wa ndani na nje kujitokeza na kuwekeza katika sekta ya
utalii katika ukanda Kusini kwa lengo la kuinua sekta hiyo ili iweze kutoa
mchango unaostahili katika pato la Taifa. Amesema kuwa serikali kwa kipindi
hiki inaelekeza nguvu katika ukanda wa kusini.
Akiongelea
maadhimisho hayo kufanyika mwaka huu, mwananchi Weslaus Chaula amesema kuwa hilo
ni jambo jema kwa sababu kuenzi utamaduni hasa wa shujaa Mkwawa ni ustaarabu.
Amesema kuwa watu wote waliostaarabika wana taratibu za kuenzi na kuhifadhi
utamaduni wao. Amesema kuwa anatarajia maadhimisho hayo yatakuwa endelevu ili
kukijengea ujasiri kizazi kijacho kwa kutumia historia ya chifu Mkwawa.
Maadhimisho
ya kumbukumbu ya chifu Mkwawa yaliongozwa na kaulimbiu isemayo “utamaduni wa
mkoa wa Iringa ni chachu ya maendeleo ya utalii”. Wakati huohuo Waziri, Dkt.
Mahenge alisimikwa rasmi kuwa miongoni mwa chifu wasaidizi wa wahehe.
Mkuu
wa Mkoa wa Iringa, Dkt. Christine Ishengoma alisema kuwa maadhimisho hayo
yanalenga kuuelimisha umma kuhusu umuhimu wa kudumisha utamaduni wa mkoa wa
Iringa kwa maendeleo ya wananchi na Taifa kwa ujumla.
=30=
Hakuna maoni:
Chapisha Maoni