Na. Ofisi ya Mkuu wa Mkoa
Wafanyakazi wa hospitali ya wilaya ya
Mufindi wametakiwa kufanya kazi kwa uadilifu na upendo ili kuweza kutoa huduma
bora kwa wananchi.
Kauli hiyo imetolewa na Naibu Waziri
wa Maliasili na Utalii, Mahamod Mgimwa alipokuwa akiongea na wafanyakazi na
wadau mbalimbali wa sekta ya afya wilayani Mufindi muda mfupi baada ya uzinduzi
wa jengo la akina mama wajawazito katika hospitali ya wilaya ya Mufindi.
Mgimwa amesema “Ombi langu kwenu
pamoja na misaada hii lazima tuitumie kwa uadilifu mkubwa katika kuwahudumia
wananchi”. Amesema kuwa katika kutoa huduma bora kwa wananchi suala la upendo
na kujali wagonjwa lazima lipewe kipaumbele. Amewataka kumtanguliza Mungu muda
wote wanapotoa huduma kwa wananchi.
Akiongelea jitihada za kuipandisha hadhi
hospitali ya wilaya ya Mufindi kuwa hospitali ya rufaa, Naibu waziri huyo
amesema kuwa mazungunzo yameanza na yanaendelea vizuri. Aidha, amesema kuwa
muda mfupi ujao hospitali hiyo itapata madaktari bingwa.
Mgimwa ameuagiza uongozi wa wilaya ya
Mufindi kuwapangia madaktari katika vituo vya afya vilivyopo vijijini. Amesema
kuwa kufanya hivyo kutatoa huduma hiyo kwa wananchi wengi zaidi kuliko
madaktari wengi kubaki njini na kuwanyika fursa ya kupata huduma tiba wananchi
waishio vijijini.
Katika risala ya uzinduzi wa jengo la
akina mama iliyosomwa na mganga mfawidhi, Dakta Eugen Lutambi amesema kuwa
hospitali ya wilaya ya Mufindi inahudumia wagonjwa wan je wapatao 120 -200 kwa
siku. Amesema kuwa kwa siku hospitali hiyo inalaza wagonjwa 80 hadi 120 kwa siku.
Akiongelea wanawake wajawazito waliojifungua katika hospitali hiyo kwa mwaka
2013/2014, Mganga mfawidhi amesema kuwa walikuwa 3,891 wakati akina mama 619
walijifungua kwa njia ya upasuaji.
 |
| Hospitali ya Wilaya ya Mufindi |
Akiongelea huduma zitolewazo katika
jengo la akina mama, Dakta Lutambi amezitaja huduma hizo kuwa ni chumba cha
upasuaji, chumba cha akina mama wanaosubiri kujifungua, chumba cha akina mama
waliokwishajifungua, chumba kwa ajili ya watoto walizaliwa kabla ya muda,
vyumba kwa ajili ya ofisi za madaktari na wauguzi, chumba cha kujifungulia na
chumba cha kufulia nguo za wagonjwa.
Akiongelea mahitaji yanayohitajika
katika jengo hilo, mganga mfawidhi amesema kuwa vifaa tiba ambavyo
havijanunuliwa vinathamani ya Tsh. 801,924,000. Ameongeza kuwa wanahitajika
wauguzi 30 katika jengo hilo jipya.
=30=
Hakuna maoni:
Chapisha Maoni