NA TUMAINI MSOWOYA, IRINGA
SERIKALI
imewaagiza watendaji wanaosimamia uwanja wa Ndege wa Nduli, uliopo manispaa ya
Iringa kuzuia haraka wananchi walioanza kuvamia eneo hilo na kujenga makazi.
Baadhi
ya wananchi wa manispaa ya Iringa, wamevamia eneo la uwanja wa ndege wa nduli
na kujenga makazi, jambo litakalotishia urukaji na utuaji wa ndege na kuzuia
upanuzi wa uwanja huo.
Akizungumza
na watendaji hao, wakati wa ziara yake mkoani Iringa, Waziri wa uchukuzi Dr
Harisson Mwakyembe alisema serikali ipo katika harakati za ukarabati wa viwanja
vya ndege, hivyo ni jukumu la watendaji kusimamia maendeleo ya viwanja hivyo.
“Mpaka
watu wanavamia na kuanza makazi nyie mnakuwa wapi? Kwanini mnakaa na taarifa za
aina hii kwenye vitabu vyenu wakati serikali ipo na hatua zinapaswa kuanza
kuchukuliwa?, zimamieni haraka kuzuia jambo hili,”alisema Dk
Mwakyembe alisema lengo la kutembelea uwanja huo ni kuona namna mchakato wa
ukarabati wake utakavyokuwa ili kuongeza hadhi ya viwanja vya ndege nchini kwa
kuufanya usafiri wa anga, kutumika kwa nguvu tofauti na sasa.
Alimuomba
mkuu wa Mkoa wa Iringa, kusaidia uzuiaji wa kasi ya wananchi kuanza
kujenga makazi ndani ya uwanja huo jambo ambalo, linaweza kusitisha zoezi la
upanuzi wa uwanja. “Sasa
kama uwanja huu utakuwa na migogoro maana yake muda wa utatuzi wa migogoro
utasababisha jambo la ukarabati kuchelewa huku viwanja visivyo na matatizo ya
aina hii vikifanyiwa kwa haraka, simamieni jukumu lenu na serikali itawasaidia
mkijiweka wazi,”alisema
Alisema
uwanja wa ndege wa Iringa ukikarabatiwa utaweza kuongeza idadi ya abiria wa
usafiri wa anga, ikiwa ndege kubwa zitaanza kutua.
Alisema
kutokana na mkoa wa Iringa kuwa na vivutio vingi vya kitalii, uwanja wa ndege
wa nduli utachangia kuongezeka kwa mapato ndani ya mkoa huo.
Aidha
aliiagiza mamlaka ya viwanja nya ndege nchini, kuhakikisha kuwa uwanja huo
unanunua gari la zimamoto kwa madai kuwa ni aibu kwa uwanja kukosa kwa huduma
hiyo. Mbali
na huduma ya zimamoto, alisema jambo lingine la msingi ni kuwepo kwa uzio ili
kupunguza uvamizi wa wananchi kwenye eneo hilo.
Mkuu
wa Mkoa wa Iringa, Amina Msenzi alisema atatekeleza kwa vitendo agizo la
kuhakikisha eneo hilo linalindwa bila kuvamiwa na watu. “Ninaanza
kutekeleza jambo hili leo, nawaagiza manispaa ya Iringa kufanya tathmini haraka
ili tujue nani amevamia na nani yupo nje,”alisema
Alisema
katika tathmini hiyo, lazima kuzuia nyumba zote ambazo zipo kwenye ujenzi na
zile ambazo zilijengwa siku nyingi zifahamike ili wananchi wawekwe kwenye
orodha ya fidia wakati wa ukarabati utakapofika.
Akisoma
taarifa ya uwanja huo wa Ndege, Kaimu Mkurugenzi wa Mamlaka ya viwanja vya
ndege nchini, Thomas Haule alisema miongoni mwa changamoto zinazoukabiri uwanja
huo ni watu kuvamia na kujenga makazi.
Alisema
pia kuna eneo ambalo linahitaji fidia ya makazi katika mpango wa upanuzi abapo
usanifu wa kina utaweka barabara ya kuingia na majengo mapya ya abiria na
maegesho ya ndege. Aliitaja
changamoto nyingine kuwa ni pamoja na uchakavu wa barabara ya kutua na kurukia
ndege ambayo inahatarisha usalama wa ndege zinazotua kwenye uwanja huo.
Aidha
aliongeza kuwa kutokuwepo kwa uzio wa usalama, vifaa vya ukaguzi wa usalama na
gari la zimamoto kunachangia kupunguza hadhi ya uwanja huo.
Kwa
upande wake Meneja wa uwanja huo, Ana Kibona alisema pamoja na changamoto zinazoukabili
uwanja huo, wamefanikiwa kuongeza safari za ndege kutoka 172 mwaka 2009
hadi 771 mwaka huu.
Hata
hivyo alisema mwezi Mei mwaka huu, wanategemea kukamilisha mradi wa upembuzi
yakinifu wa kina kwa viwanja 11 vya ndege katika mikoa mbalimbali hapa nchini.
Alisema
ripoti ya upembuzi na makabrasha yatatumika kutafuta fedha za kazi za ukarabati
na upanuzi katika viwanja husika ili kuinua sekta ya usafiri wa anga hapa
nchini.
=30=
Hakuna maoni:
Chapisha Maoni