HOTUBA
YA MKUU WA MKOA WA IRINGA MHESHIMIWA AMINA MASENZA KATIKA UZINDUZI WA KAMPENI
YA MAMA MSOSI LISHE ILIYOFANYIKA KATIKA BUSTANI YA MANISPAA YA IRINGA TAREHE 11
NOVEMBA, 2017
Ndugu Katibu Tawala Mkoa,
Waheshimiwa Wakuu wa
Wilaya,
Ndugu, Mstahiki Meya wa
Manispaa ya Iringa,
Wakurugenzi wa Mamlaka za
Serikali za Mitaa,
Ndugu Viongozi wa Dini,
Ndugu Viongozi wa Kisiasa,
Wadau wote wa Masuala ya
Lishe Mkoa wa Iringa,
Waandishi wa Habari,
Mabibi na Mabwana
Awali ya yote napenda nichukue fursa hii kuwakaribisha
katika uzinduzi wa Kampeni ya MAMA MSOSI
LISHE katika Mkoa wa Iringa. Kwa niaba ya Mkoa wa Iringa napenda
kuwashukuru viongozi na wadau wote walioshiriki kwa hali na mali katika
maandalizi na hatimae kuwezesha uzinduzi wa kampeni hii.
Lengo la Kampeni ya Mama Msosi Lishe ni
kutoa hamasa kwa jamii kuhusu Lishe Bora kwa familia, Usafi wa Mazingira
na matumizi ya Nishati mbadala ili kuboresha rasilimali ya Misitu.
Ndugu
Wananchi,
Kampeni ya Mama Msosi Lishe ni mojawapo ya njia ya
kuboresha Lishe kwa familia na kuondoa matatizo yanayosababishwa na Lishe duni.
Wataalam wa masuala ya Lishe wanatuambia kuwa watoto waliopata huduma bora za Lishe,
katika kipindi cha siku 1,000 za kwanza za uhai wao ambazo zinaanza tangu mama
anapopata ujauzito hadi mtoto anapotimiza umri wa miaka miwili wanapata faida
zitakazodumu katika maisha yao yote.
Hiki ndicho kipindi mtoto anapojenga msingi wa
ukuaji wa mwili na maendeleo ya akili. Kwa bahati mbaya madhara ayapatayo mtoto
katika ukuaji wake kimwili na maendeleo ya kiakili kutokana na Lishe duni
katika siku 1,000 za kwanza za maisha yake hayawezi kurekebishwa kwa maisha
yake yote.
Faida
hizo ni:-
·
Maendeleo mazuri
ya ukuaji wa ubongo,
·
Uwezo mzuri wa
kukabiliana na maradhi,
·
Uwezo mzuri wa
kiakili,
·
Uwezo na ufanisi
wa kujifunza,
·
Uwezo mkubwa wa
kujiingizia kipato wakiwa watu wazima.
Ndugu
Wananchi,
Suala la Lishe ni mtambuka. Hivyo, katika jamii utapiamlo
ni matokeo ya mkusanyiko wa matatizo mengi yanayotokana na mpangilio usio mzuri
wa chakula na ulaji mbaya wa chakula. Matatizo hayo ni:
- Ulaji duni usiokidhi viwango vya virutubishi vyote vinavyotakiwa katika mwili,
- Maradhi mbalimbali,
- Kutokuwa na uhakika wa chakula,
- Matunzo duni ya wanawake na watoto,
- Mazingira machafu na huduma duni za Afya,
- Rasilimali haba na mgawanyo usiokuwa na uwiano sahihi,
- Umaskini wa kipato,
Ndugu
Wananchi,
Sote tunapaswa kufahamu kwamba Lishe duni kwa
wanawake wajawazito inawaweka katika mazingira yanayoweza kusababisha
kujifungua watoto njiti, waliokufa, kuharibika kwa mimba, kuzaa watoto wenye
vichwa vikubwa, kuzaa watoto wenye mgongo wazi, kuwadhoofisha wanawake
wajawazito na hivyo kuugua mara kwa mara, kupoteza maisha wakati au baada ya
kujifungua. Vifo vya wanawake wajawazito vitapungua sana endapo watakuwa na hali
nzuri ya Lishe katika kipindi chote cha ujauzito.
Pia tunafahamu kuwa athari
nyingine za Lishe duni kwa mwanadamu ni pamoja na tezi la shingo (Goita),
upofu, kudhoofisha kinga ya mwili, kupata vidonda kinywani na fizi kutoka
damu.
Kwa mujibu wa utafiti
(TDHS, 2015/2016) umebaini kuwa hali ya Lishe ya wanawake na watoto
bado ni mbaya Mkoani Iringa. Asilimia 28 ya wanawake wajawazito wana upungufu
wa damu. Asilimia 42 ya watoto wamedumaa, asilimia 13.8 wana uzito pungufu,
asilimia 3.6 wana ukondefu na asilimia 7.2 tu ndiyo wanalishwa vyakula vya
nyongeza ipasavyo.
Ndugu
Wananchi,
Mkoa wa Iringa kwa kushirikiana na wadau mbalimbali
umekuwa ukichukua hatua za kukabiliana na tatizo la utapiamlo. Hatua hizo ni
pamoja na kutoa elimu ya Lishe katika vituo vya kutolea huduma, kutoa matibabu
ya utapiamlo, kuhamasisha jamii kubadilli tabia za ulaji usiofaa na kufuata mtindo
bora wa maisha, kuhamasisha usafi wa mazingira, kuwahi kliniki pindi mama
anapogundua kuwa mjamzito.
Ndug
Wananchi,
Serikali ya Awamu ya Tano inatambua umuhimu wa
kuwekeza katika masuala ya Lishe kama mkakati mmojawapo wa kufanikisha azma ya
Serikali kufikia uchumi wa kipato cha kati na viwanda ifikapo 2025. Baraza la
Umoja wa Mataifa liliweka azimio la kuwa kati ya mwaka 2016 hadi mwaka 2025 ni
miaka ya "Kuchukua Hatua katika
Kutekeleza Masuala ya Lishe - Decade of Action on Nutrition".
Hivyo,
wito wangu kwa wananchi wa Mkoa wa Iringa, tuunge mkono juhudi zinazofanywa na
Serikali yetu katika kupambana na tatizo la utapiamlo. Tukishirikiana pamoja
katika kuunga mkono juhudi hizi kutatuwezesha kufikia adhima ya kuwa nchi ya
uchumi wa kati ifikapo mwaka 2025.
Ndugu
Wananchi,
Katika
kukabiliana na tatizo la utapiamlo ni vizuri elimu bora itolewe kwa jamii juu
ya:
- Uandaaji wa chakula kwa sababu maeneo mengi huloweka mahindi muda mrefu na kupoteza madini na vitamini
- Ulishaji wa watoto wadogo uzingatie vyakula mchanganyiko, idadi ya milo na kiasi cha chakula cha kumpa mtoto kulingana na umri kuanzia kipindi mtoto anapotimiza miezi 6 mpaka miaka miwili.
- Kina baba washiriki kikamilifu katika ufuatiliaji wa makuzi na maendeleo ya mtoto pasipo kumuachia mama pekee.
- Kina mama wajawazito lazima waanze mapema kliniki ya uzazi ili kupata huduma muhimu kama vidonge vya kuongeza damu, kusaidia ukuaji bora wa mtoto, dawa za minyoo, kuzuia Malaria na VVU. Katika jambo hili, niombe ushiriki wa kina baba katika kuwaruhusu na kuwasindikiza kliniki kina mama.
Ndugu
Wananchi,
Kabla sijamaliza hotuba yangu, nitoe rai kwenu kuwa
Kampeni ya Mama Msosi Lishe ilete mabadiliko chanya katika jamii nzima. Tufuatilie
kwa makini mada zitakazowasilishwa kupitia vyombo vya habari na vipindi vya
mjadiliano, wahudumu wa ngazi ya jamii, wadau na wataalamu mbalimbali katika
vituo vya kutolea huduma za afya ili kupata elimu na ufahamu zaidi kuhusu masuala
ya Lishe.
Ni wajibu wa kila mmoja wetu, kwa nafasi yake kujitolea kwa dhati
kuleta hali bora ya Lishe kwake, kwa familia yake na kwa Wanairinga wote.
Ndugu wananchi, baada ya kusema hayo,
“NATAMKA
RASMI KUWA KAMPENI YA MAMA MSOSI LISHE IMEZINDULIWA”
Asanteni
kwa kunisikiliza!
Hakuna maoni:
Chapisha Maoni